×
×

Siri ya Kupata Furaha ya Kweli

Swahili English

Je, kuna siri ya kuwa na furaha ya kweli maishani? Mara nyingi sisi hujiuliza swali hilo. Kuna wakati maisha huwa magumu sana na kutuletea mkazo na mawazo mengi.

Kulingana na utafiti uliofanywa hivi karibuni, kuna siri ya kupata furaha ya kweli, na siri hiyo huenda ikakushangaza. Siri ni kuwa na shukrani.

Watu wengi na huenda hata wewe, hufikiri kwamba shukrani huonyeshwa mtu anapokuwa na furaha. Yaani, jambo zuri linatokea ndipo unakuwa na furaha.Furaha hiyo inakufanya uwe mwenye shukrani.

Lakini vipi tukitumia kanuni hiyo kwa upande mwingine? Vipi ikiwa kuwa mwenye shukrani ndiyo sababu ya kuwa na furaha?

Kuwa Mwenye Shukrani Kutakupa Furaha

Utafiti ulifanywa na wanasaikolojia wa Chuo Kikuu cha California. Utafiti huo ulihusisha vikundi vitatu vya watu walioambiwa waandike kuhusu maisha yao ya kila siku kwenye kitabu cha kumbukumbu katika kipindi cha majuma 10.

Kikundi kimoja kiliambiwa kiandike kuhusu maisha ya kila siku. Kikundi cha pili kiliambiwa kiandike kuhusu matatizo wanayokabili juma hilo. Kikundi cha tatu kiliambiwa kiandike mambo wanayothamini na kushukuru. Huenda ikawa jambo la kawaida tu kama kuona machweo maridadi, kuzungumza na rafiki mpendwa au kushuhudia mtoto akitabasamu.

Baada ya utafiti kumalizika, kila kikundi kiliombwa kuzungumzia yaliyojiri katika kipindi hicho cha majuma 10. Washriki wote walikabili hali za kawaida za maisha, hata hivyo, kikundi kilichoandika mambo wanayoshukuru katika kitabu walikuwa na furaha kwa asilimia 25 zaidi.

“Kikundi kilichoandika mambo wanayoshukuru katika kitabu walikuwa na furaha kwa asilimia 25% zaidi”

Washiriki walioandika shukrani walikuwa na matumaini mazuri kuhusu wakati ujao, na iliripotiwa kwamba walikuwa na matatizo kidogo zaidi ya afya kama vile mawazo kupita kiasi au maumivu ya kichwa. Hata walionekana kuwa na nia na nguvu na walifanya mazoezi kwa wastani wa saa 1.5 zaidi ya washiriki wengine katika vikundi!

Kuwa mwenye Shukrani Huboresha Mahusiano

Watafiti wengine wamepata matokeo hayo pia. Utafiti mmoja uliochapishwa na Association for Psychological Science ulionyesha kwamba kumshukuru mwenzi wako wa ndoa au rafiki yako kutakufanya uwe na mahusiano imara ya kihisia na kimapenzi.

“Kumshukuru mwenzi wako kutakufanya uwe na mahusiano imara ya kimapenzi”

Uchunguzi mwingine uliofanywa na Wharton School of Business ulionyesha kwamba meneja wanaoshukuru wafanyakazi wao huongeza kiwango cha uzalishaji kwa asilimia 50 zaidi kwa sababu wafanyakazi wao huhisi wamethaminiwa. Jambo hilo pia hutokea kwa wajitoleaji wa kazi. Wahusika wanapotoa shukrani, wajitoleaji hufanya kazi kwa bidii zaidi na wengi wao huwa tayari kujitolea tena wakati ujao uhitaji ukitokea.

Kuwa Mwenye Shukrani Huboresha Ubongo Wako

Utafiti ulio wa pekee zaidi kuwahi kufanywa na wanasayansi ni ule uliohusisha ubongo wa mwanadamu katika Chuo Kikuu cha California huko Los Angeles. Waligundua kwamba kila mara unapofikiria au kukumbuka mambo unathamini au kushukuru, ubongo wako hutokeza molekuli zinazoboresha ubongo wako.


Unapokazia fikira au kutafakari kuhusu mambo unayothamini na kuwa mwenye shukrani, seli katika ubongo wako hufanya kazi katika kiwango kikubwa zaidi na jambo hilo hukufanya uwe mwenye furaha na kuridhika. Wanasayansi walifikia mkataa kwamba, kuwa mwenye shukrani ni njia bora zaidi ya kuwa na furaha.

“Kuwa mwenye shukrani ni njia bora zaidi ya kuwa na furaha.”

Shindano la Kuwa na Shukrani na DreamLink

Matokeo ya tafiti hizo yanatuchochea sana. Kwa sababu hiyo basi, wafanyakazi wote wa DreamLink wameamua kutumia ushauri huo pindi hii tunaposheherekea uzinduzi wa DreamLink kwa kufanya kile tunachokiita “Shindano la Kuwa na Shukrani na DreamLink”.

Ni rahisi sana. Mwezi ujao kila mmoja wetu amejidhatiti kufanya yafuatayo:

1) Kuwa na Kitabu cha Kuandika Mambo Tunayoshukuru

Tutaandika mambo machache kila juma tunayoshukuru. Mambo hayo yanaweza kuwa madogo tu yanayotufanya tutabasamu au tuhisi tunathaminiwa.

2) Kuandika Ujumbe wa Shukrani kwa Mtu

Mwezi huu pia tutatumia dakika chache kuandika ujumbe wa shukrani kwa mtu tunayemthamini. Si lazima ujumbe uwe mrefu sana badala yake ujumbe tu utakaofanya siku ya mtu tunayemtumia iwe murua na ajue kwamba tunamthamini sana.

3) Tutasheherekea “Alhamisi ya Kutoa Shukrani”

Kila alhamisi ya mwezi huu, tutaweka ujumbe unaoonyesha jambo tunalothamini au kushukuru kwa marafiki na familia zetu. Tunaweza kuandika ujumbe mfupi kwenye Facebook, ujumbe wa WhatsApp kwa marafiki au katika maongezi yetu na familia wakati wa mlo wa jioni.

4) Tuambie Matokeo Yako

Mwishoni mwa mwezi, tutatoa matokeo ya juma kupitia jumuiya ya DreamLink. Tutawaambia mambo tuliyopenda, changamoto tulizokabili na mambo tuliyojifunza.

Je, utajiunga nasi katika Shindano la Kuwa na Shukrani na Dreamlink? Kufanya hivyo kutachukua dakika chache za wakati wako. Ikiwa matokeo ya tafiti zilizofanywa ni sahihi, kufanya hivyo kutabadili maisha yako. Tungependa sana ujiunge nasi!

0
MAONI Sambaza

0 Maoni

Ili uandike maoni katika DreamLink ni lazima uwe umejisajili na umeingia katika akaunti. Tungependa kupata maoni yako hivyo acha tukusajili sasa!

Ingia